Syi'iran Madura: Caretana Ajjhi Saleh

Oleh: Dhafir Abdullah*

Nèka carèta, carèta takanta

Tapè hikmana kenning abâs è mata

Pèrengngaghi mallè toron rahmatta

Moghe manfaat dunnya kantos ahèratta

Ajjhi solèh orèng sè palèng kaya

Lakona ghun pèra’ a foya-foya

Bânnya’ dunnyana bânnya’ kèya binina

Ongghâ haji pon tak è temmu kalèna

Kakananna nyaman bân kobâssa

Roma bân sabâna jhâ’ luassa

Kalambhina bânnya’ ta’ parlo nyassa

Sakèng cârrè’na orèng sa dhisa

Mun nyator jhâ’ sombongnga

Ajhâlân jhâ’ angkona

Marènta jhe’ kasarra

Angghui tanang kacèrra

Bâkto jhi salèh kaloar romana

Bâdâ bhurumain ta-minta

Nyambi mangko’ tambellen kalambhina

Ajjhi sè kaya kaulâ minta’a sadâkana

Ajjhi salèh ajâwâb jhè’ kasarra

Èngkok rèya bènni èmbana bè’na

Nyarè pèssè jhât lakar sara

Ma’ pèra’ mintaa bè’na jhè’ nyamanna

Bhurumain nâng ngânnâng mulaè ghâllè’

Pèssè sè e arâp nèka pon tadâ’

Toju’ ka râbbhâ mèsem alâ’ ghâllâ’

Ngangka’ tanang adhâbu ka sè lambhâ’

Alhamdulillah alhamdulillah

Kasoon ya Allah

Ta’ ollè rajhèkkè

Dâri ajjhi salèh

Sobung sè palèng bânnya’ dèri abdhina

Narèma paparèng è sabbhân arèna

Sè è sèlèn ka atè sè sobung bâtâs

Muljâ polana tak kânning abâs

Ajunan sè nyipta dunnya nèka kèni’

È bhânding ahèrat dunnya nèka sakoni’

Mun cârrè’ nganiajâ ka abâ’na dhibi’

Bhâkal è tanya è lagghu’ paghi’

Bhurumain nèka nyinglah pas èlang

Ajjhi salèh manjhâng sambi tacângngang

Kasta padâ bâdèâè dâlâm atè

Dunnyana sâolah sâolah pas sobung artè

Todussâ dâ’ ka allah

Ta’ oning a sadâkah

Todussâ dâ’ ka allah

Sombong dâlâm ibadah

Èngko’ rèya orèng kayana sa dhisa

Arapa ângko’sèpalèng rajâ dhusa

Ajjhi salèh athobhât sambi nangis

Arapa ângko’ amuljâ’ân pângâmis

Ajjhi Salèh ajhânjhi dâlâm atè

Jhânjhi sè è èstoaghi sampè matè

engko’ dhâddhiâ orèng asokkor

Mughâ lagghu’ tak dhâddhi orèng tâkkor

Mulaè ghânèka jhi Salèh aobâ

Anak bini èpakompol padâ bâdâ

Mun bâ’na târro masoa suarghâ

Mara dhunnya ka akhèrat rèya ghibâ

Pabânnya’ asadâka

Abârri’ jhâ’ ka sângka

Pabhunga rèya umat

Umat nabi Muhammad

Ajjhi Salèh bânnya’ asadâka

Odi’na pon mulaè sederhana

Ka orèng pon mulaè andhâp asor

Kadhi nèka carana orèng asokkor

Anakna ngoladhi jhâ’ bhungana

Nuro’ sederhana bân lambhâ’na

Ikhlas tâkka’a tak èparèngi dhunnya

Sè pânting warisan èlmu aghâmana

Ajjhi Salèh dâddhi sandârân orèng bânnya’

Tapè hèranna dhunnyana sajân bânnya’

Ajjhi salèh wafat malâm jumat manis

Orèng sadhisa kaèlangan kabbhi nangis

Ontongnga ajjhi Salèh

Dhâddhi  orèng sè è pèlè

Dunnya dâddhi akhèrat

Dâddhi orèng sè manfaat

Sânnângnga kanjâng nabi

Umat è èstoaghi

È suarghâ sè tèngghi

A sarâng kanjeng nabi

---

*) Penulis merupakan guru di Nurul Jadid