Carpan: Lekkas Paju

Oleh : Fendi Febri Purnama*

Sem-mèsem Abi sè ghi’ ta’ abhâlâ èbâkto Kè In acarèta oghem, èkatong-ontong abâ’na noro’ sè katello sè namoy ka tokang mamaca sè bâḍâ è Lamongan, engghi nèko Mas Yoan, Mas Hidayat, bi’ Mas Febri.

“Ah teppa’ rèya engko’ terro nèngghuwâ bârâmma jhuḍhuna engko’,” ca’na Abi ḍâlem atèna. Kèng sè sanèko pon sè katello tao ḍâri pamesemma Abi laèn pon.

“Aih bâ’na ma’ masè’è ta’ nyaman pamèsemma, Bi,” nyambhung Mas Yoan.

Abi ta’ nyaot, pèra’ ngoca’ nemmo bhâi ka Mas Yoan. Sè katello pas ta’ lajhu parcajâ ècokoco èyaḍâ’na Kè In Abi nèko.

“Sih mara ra pas abâlâ ka Kè In jarèya jhâ’ mènta tebbhâk hè..hè...,” ca’na sè katello. Abi ghu’-ongghu’ân ta’ nyaot mèsem saparo aghellâ’.

“Mon ghânèko ghâmpang, Cong. Masala jhuḍhu ètemmo mon èyoghem kèng mon jhubâ’ rowa ollèna pas toḍus dhika,” ca’na Kè In.

Abi nyaot èsoro nang-tennang abâ’na pastè abâli polè ka Kè In laèn bâkto bilâ nerraghiyâ ongkossa tangghâânna mamacana Kè In. Kan pas ta’ tao sè katello rosèya nèko.

Abi bi’ Mas sè katello pon lanjhâng lèbâr sè bâr-tabârân bi’ Kè In masala bâkto bân ongkos tangghâ’ân. Ta’ cèccèr kèya ma’ lè rèng-orèng ḍinas (ca’na) sè kaempa nèko parcajâ bân cocok ka grup mamacana, Kè In majhâghâ pajhânganna bi’ maca tembhâng Kasmaran pamokka’ sè aghâmbhârrâghi kataohèdhân. “Oh baddhina ca’na Abi bi’ Mas sè kaempa sè ngoca’ ḍâri ḍinas,” sambi gu’-onggu’on bhuru tao ma’na ḍâlemma ḍâri tembhâng Kasmaran.

Kopina pon èpakarè sa’arra, nang-ghinang satopplès pon èpakarè saparo ta’ èkarassa èghibâ tor-catoran bi’ Kè In. Pas rèng-orèng ḍinas (ca’na) nèko pamèt polana pon saroju’ kabbhinna masala ongkos bi’ bâktona.

Sè Abi sambi asalaman masènga’ ka Kè In “Sènga’ Kè kaulâ ngaḍâ’âna ḍâ’enjâ sambi ngaterraghiyâ ongkossa mamaca, jhâ’ pajhubâ’ Kè oghemma kaulâ pamara nyamana Nurbhuwât Kè pabhuwât hasèlla”. Kè In sem-mèsem ngèḍing ghânèko ta’ bisa aghellâ jhât sabbhâr ghâllu nè Kè In mara tako’ sè ngakaka. Pagghun sè jhuḍhu ètanya’aghiyâ bi’ Abi orosan nafkana ḍi-buḍi ca’na sè penting nemmo ghâmbhâr jhuḍhuna mara napè pas èkabinèya lulussa kuliah ca’na. Bhârenteng ongghu Abi. Aghâlubhuk.

Ollè tello arè ḍâri sè kaghâḍiyâ, Abi abâli polè polana jhât èsoro ngaterraghi ongkos bi’ Mas Yoan ka Kè In. Cè’ kabhuruna ngaghâruḍu’ èyampèrra Kè In.

“Pora pora Kè In,” ca’na Abi ta’ on-laon sowarana.

Kè In kaḍhâpa’an ta’ ngarè’ bâḍâ èbengkona polana pon ètèlpon bi’ Mas Yoan soro jhâ’ ḍâ’emma’an ghâllu polana abâ’na pon nyoro Abi nerraghi ongkos tangghâ’ânna.

“Nèka’ Kè ongkossa, mon korang napa soro abâlâ dhibi’ Mas Yoan,”ca’na Abi. Ta’ nyaot lâkka’ Kè In ètampol polè bi’ Abi, Bhuh kabhuru ongghu kana’ nèko.

“Nyara Kè pas oghem kaulâ, nèka pon sè ra-mèra mon sè ru-bhiru mè’ korang mapan ollèna.”

Kè In mèsem bân ngartè napè sè èkakarep Abi. Pas ngala’ kètab Panḍhâbâ  sè kolè’na aghâmbhâr Agnes Monica polana kolè’ aslina pon sebbhit èkamarra. È mèjana Kè In nyabâ’ kètappa, ḍâri bhârentengnga Abi ta’ ngantos Kè In nyator pas ajhulu sè ra-mèrana.

“Aḍḍhu cè’ kabhuruna ongghu dhika Cong,” aghellâ’ mon nonto Kè In polana pèra’ kaḍuwâ ta’ patè toḍus mara sè ghi’ Abi abhâreng mas-mas ḍâri ḍinas (ca’na).

Kè In maca jhâpana sambi meddhem nyabâ’ sè ra-mèra è la-sellana lembârân kètappa.

“Ah ghânèka pon Kè nyara nyara bâcâ tebbhâk pas jhuḍu kaulâ bârâmma?”

“Dhika jhuḍhuna ma’-semm,a Cong. Bhâghus Cong, dhina tekka’ dhika asakola ka Jâkarta pagghun dhika ngèbâ jhuḍhu ḍâri ḍiyâ,” ca’na Kè In.

 “Sih ongghuwân Kè, bâli’i polè napa,” kapaksa abâli’i polè Kè In tagher tello kalè tapè ollèna paḍâ. Senneng atèna Abi tebbhâghâ jhuḍuna ma’-semma jhâ’ sènga’ bisa ngala’ SKS lebbi bânnya’ èkala’a kabbhi rassana karèna semèsterra kabhuru wisuḍâ’a pas nyarèya jhuḍhuna sè ca’na ma’-semma’ dhina tekka’ poncana ghunong jhâlân makaḍam èlabbhusâ èh Abi nèko Abi.

Pas apamèt Abi kabhuru napa’a ka bengkona pola marè napa’ ka bengko pas taghibâ ka mèmpè jhuḍhuna pas ngaton.

“Entos Cong ma’ jân sèpa’ bulâ bhâri’ânna ollè leppet pas mamaca è parlo, entos èkala’a,” ca’na Kè In. Marè leppet ètegghu’ Kè In pas èpathokkaghi ka cètakka Abi. Takerjhât Abi ma’ bisa èpathok leppet cètakka hèran abâ’na.

“Ghânèko sè ca’na orèng mon èpamara ghânèko sèkat ollè jhuḍhu,” nyaot Kè In. Abi ghu’-onggu’ân bhuru tao ma’ èpanga’ ghanèko bâddhinna paḍâ bi’ kareppa.

 Abi molè sambi angen-angen nompa’ sepèḍa motor bhâ’ mara napè jhuḍhuna lagghu’ jhâ’ kabhuruna napa’a ka ghânèko. Mandher noro’a ka mèmpè ca’na.

“Bârâmma marè ongkossa, Bi, èbâghi?” mas Yoan nèlpon. Be lopot nyaotta Abi

“Marè pon kaulâ èyoghem.”

Ngalakkak mas Yoan ngèḍing saotta Abi sè lopot.

“Palang bâ’na Bi ma’ pas pot-talopot kabhuru abinèya bâ’na! Pamarè lun kuliyana! Negghu’ lako pateppa’.”

“Aḍḍhu maap mas kabhuru kaulâ Ha..Ha...,”ghi ngennèng nyaot Abi.

Rèngkessa bâkto polana pon PPKM taḍâ’, Abi abâli ka kampussâ è Jakarta. Sampè’ lulus, ba’-nyobâ’ na Abi amar-lamar lako è ma’-semma’na bengkona, engghi pon èkarajhekkèyaghi ollè lako sè nyaman sè ta’ jhâu ḍâri orèng seppona. Ma pas ènga’ ka oghemma Kè In, pas nyarè ongghu ka jhuḍhuna engghi ta’ langsung nemmo, kèng abâ’na pagghun parcaja ka aḍhât tekka’ omorra ngoḍâ bân sabbhâr ta’ pegghâ tampar nyarè jhuḍhuna pon karè ghânèko sè ta’ tekka. Tapè mon bâktona napa’ ghi napa’ kèya. Abi katemmo bi’ jhuḍhuna sè semma’ ongghu mala sakacamatan. “Ḍhu taḍâ’ salana marèna ngoḍḍhi oghem jhâ’ manossa ta’ tao ka pastèna ghun bisa usaha.”

 

 

Angghidhân

Fendi Febri Purnama (Ghuru Bhâsa Madhurâ SMA Negeri 1 Asembagus).