Manisan Cupcup: Manis Rassana Ate

Oleh: Raden Ajeng Afifah Maharani* 

E settong kellas, bâḍâ mored se asmaepon Bara. Bara ghapaneka mored se kabilang pènter, sopan, sareng bhârânca. Bara samangkèn ampon kellas 12 jurusan MIPA. Bara segghut èpanoro’ olimpiade-olimpiade, biyasana olimpiade matematika, fisika, sareng kimia. Bara lakar pènter, IQna è attas kabânnya’an, namong orèngnga teptep anḍhap asor. Bara lakar senneng entar ka perpustakaan è bâkto istirahat. Ta’ coma maca buku pangajhâran, namong Bara jhughân maca buku-buku laènna.

Bara anḍi’ kanca sè asmaèpon Bayu sareng Bari. Katellowan pajhât sakancaan dari SD sampè’ samangkèn. Katellowan ghapanèka anḍi’ bakat bâng-sèbâng. Bara kalonta sareng kapènterranna è bidang akademik, Bayu kalonta mènangka kaptèn baskèt bân senneng ka olahraga, namong Bari kalonta mènangka ketua OSIS bân segghut mennang lomba lukis. È sakolaan, katello sahabat ghanèka esebbhut “Tello’ Pangeran B”, amargha katello sahabat ghanèka salaènna gantheng paḍana pangèran, pènter, sareng berbakat, nyama aḍa’na ḍa-paḍâ dari huruf B. Bânnya’ rèd-morèd sè senneng bân nge-fans ka sè katellona. Sampè’ aberri’ hadiah bân mènta tandatanganna. 

“Bay, Ri, sèngko’ èntara ka perpustakaan yâ!” Oca’ Bara ka Bayu bân Bari.

Bayu nyaot,“Antos lun, mara entar ka kantin, bâ’na ta’ lapar apa, Bar?”

“Iyâ, sèngko’ bân Bayu èntara ka kantin pannèngnga lapar, Bar, mayu’ ra ka kantin abhâreng” Tambâ Bari.

“Mèlana sèngko’ setia kawan, yâ mara abhâreng ka kantin maskèna sèngko’ ghi’ ta’ lapar” Oca’ Bara sambi aghellâ’.

Katellowan lajhu abhâreng entara ka kantin. Namong, e aḍâ’na kellas rammè sareng penggemarra katello sahabat ghânèka.

“Duh, ma’ rammè yâ!” Oca’ Bari mengnga’.

“Iyâ, biyasala pastè jârèya ngantos sèngko’ mènta’a tandatangan bân afotowa.” Oca’ Bayu sambi akanḍha.

“Teppa’ ongghu bâ’na, Bay.” Oca’Bara sambi ngalakkak.

“Addoh… alamat rèya ta’ mèlo ka siomayya Bhi’ Nana” Bari nyaot.

“Beh, iyâ palang” Saot Bara bân Bayu abhâreng.

“Mayu’la labbhus, buru yu’!” Oca’ Bayu.

“Yu’!” saot Bara bân Bari.

Katellowan abâlâ ka penggemarra jhâ’ èntara ka kantin, mun mènta’a tandatangan bi’ afotowa bisa molèna sakola ḍâgghi’. Bara, Bayu, bân Bari lajhu buru nyellor è sellâ’na penggemarra entar ka kantin. È bâkto buru, Bara tatabra’ ka sèttong rèng binè’. Morèd kellas 11 MIPA se asmana Rada. Bruuukkk… Bara bân Rada tatabra’ lajhu talabu.

“Duh…” serro Rada.

“Saporana yâ, sèngko’ ta’ sangajjha nabra’ bâ’na.” Oca’ Bara sambi nolongè Rada jhâghâ.

“Iyâ, ta’ arapa, alhamdulillah taḍâ’ sè loka. Bâ’na ma’ ta’ ajhâlân pasèpa’, mon tatabra’ ka ghuru otabâ na’-kana’ sè laèn kan palang, laèn bâkto tè-ngatè jhâ’ ru-buruwân è koridor sakolaan.” Oca’ Rada.

“Iyâ, sèngko’ saporana yâ, pannèngnga kabhuru ka kantina bhârèng kanca.” Oca’ Bara.

“Ongghuwân bâ’na ta’ arapa?” Bari atanya ka Rada.

“Mon bâḍâ sè sakè’ mayu’ entar ka UKS lun” Tambâ Bayu.

“Enjâ’, ta’ papa. Sèngko’ bisa entar ka UKS dhibi’. Iyâla yâ, sèngko’ entara ka ruang guru pannèngnga èdhikanè Bu Mirna.” Saot Rada sambi negghu’ lengngenna.

“Èyaterra yâ.” Oca’ Bara.

“Ta’ osa.” Rada nyaot.

Rada lajhu entar ka ruang guru, seḍḍhengngan Bara, Bayu, bân Bari nerrossaghi entar ka kantin. È kantin, katello sahabat ghanèka lajhu messen siomay ka Bhi’ Nana.

“Bhi’… Siomay tatello’ ghi.” Oca’ Bari.

“Siap, B1, B2, B3!” Bhi’ Nana nyaot.

“Ta’ kala ka vitamin B bhâi ghanèka, Bhi’, B1, B2, bân B3.” Oca’ Bara sambi aghellâ’.

“Yâ, teppa’ bâ’na, Bar. Nemmo bhâi kana’ rèya” Saot Bhi’ Nana sambi aghellâ’ân.

“Oh iya, arowa ghellâ’ sè tatabra’ ka bâ’na sapa ya, Bar? Ma’ sèngko’ bhuru nangalè samolaè asakola è diyâ.” Oca’ Bayu sambi ngakan karopo’.

“Ta’ tao yâ, sèngko’ bhuru nangalè kèya, Bay.” Bara nyaot. Tapè, è ḍalem atè bân pèkkèranna, Bara arassa ta’ asing ka Rada, paḍâna sè perna kennal.

“Masèna jârèya nyamana Rada na’-kana’ kellas 11 MIPA, polana sèngko’ segghut nangalè jârèya aḍântè’ Rima mon bâḍâ rapat OSIS. Abâsânna jârèya sahabatta Rima. ” Oca’ Bari mènangka ketua OSIS sè tao ka Rima (bendahara OSIS).

“Siss… bâ’na bâḍâ apa bân Rima, Ri, aih aih ta’ acarèta” Oca’ Bayu aghuḍhâ Bari.

“Nemmo bhâi bâ’na, jhâ’ Rima bendahara OSIS ya sèngko’ mastè tao” Bari nyaot.

“Ambu lun, mara siomayya ḍâtengla ee..” Oca’ Bara sambi ngala’ siomay sè èghibâ sareng Bhi’ Nana.

Samarèna ghanèka, bel amonyè, Bara, Bayu, bân Bari abâli ka kellassa. Ta’ èkarassa bâkto ajhâlân jhâ’ sèkatta, motemmo lajhu bel amonyè sè nanḍhâ’âghi pangajhârân è sakolaan la taḍâ’.

“Mayu’.. molè-molè” Oca’ Bayu.

“Sèngko’ loppa ta’ mabâli buku ka perpustakaan, kassa’la bâ’na kaḍuwâ molè ghilluwân” Oca’ Bara ka Bayu bân Bari.

“Oke, sèngko’ bân Bari mole ghillu ya, Bos!” Bayu nyaot.

“Oke, Bos!” Saot Bara.

Bara entar ka perpustakaan ghâbay mabâli buku. È perpustakaan, Bara katemmo polè ka Rada. Ta’ tao arapa, Bara temmo neng-ngenneng ngabâssâghi Rada sè ngala’ buku è erra’. Obu’na Rada sè celleng areng akebbhâr. Kolè’ potè paḍâna susu. Pèpè mèra mara mawar. Maskè Rada ta’ adhândhân pagghun raddhin ènga’na putri raja. Ḍâḍâna Bara arassa amonyè paḍâna ghenḍhâng. Lèsanna Bara terro nyantowa Rada, namong Bara ta’ bisa acaca. Pagghun neng-ngenneng ngabâssâghi Rada.

“Bar, bâ’na mabâliyâ buku, yâ?” Tanya Romi, sè teppa’ ajâgâ perpustakaan pannèngnga Bu Nia bâḍâ rapat.

Bara pagghun neng-ngenneng. Romi langsong neppak bhâuna Bara.

“Beh.. Apa, Rom?” Bara tacengnga’.

“Bâ’na arapa ma’ meddek? Sèngko’ atanya bâ’na mabâliyâ buku? Polana sèngko’ se ajâgâ satèya, Bu Nia ghi’ rapat wa.” Oca’ Romi.

“Ah, iya, sèngko’ mabâliyâ buku yâ.” Bara nyaot.

“Mayu’ kemma, Bar.” Romi mènta bukuna ka Bara.

Bara pas maghi bukuna ka Romi. Bara lajhu atanya ka Romi, apa bhenḍer babinè’ sè bâḍâ è erra’ buku novèl nyamana Rada. Nyatana bhenḍer Rada. Ta’ tao arapa, Bara arassa bâḍâ sè anè. Bara ta’ saḍar jhâ’ abâ’na tarèsna ḍâ’ Rada. Nèka bhuru tao Bara arassa tarèsna ḍâ’ ka rèng bine’. Lambâ’ bâkto TK, Bara ènga’ jhâ’ bâḍâ kana’ binè’ nolong Bara sè talabu ḍâri sapèḍâ è selokan semma’ bengkona Bara sè sabbhân. Kana’ binè’ rowa aberri’ manisan cup-cup ma’lè Bara ta’ nangès polè. Sapa sangka jha’ kana’ binè’ kasebbhut èngghi anèka Rada. 

Bara aḍântè’ Rada sampè’ kalowar ḍâri perpustakaan. Teppa’na Rada kalowar dari perpustakaan, Bara atanya da’ Rada apa bhenḍer ghella’ ta’ arapa-rapa bakto tatabrak ka Bara. Rada pagghun ajawab tak arapa-rapa, namong Bara pagghun kobater. Bara jhughan ragu atanya’a ka Rada apa lamba’ Rada perna nolong kana’ lalake’ se talabu dari sapeda e selokan. Tape, Bara lajhu atanya ka Rada.

“Iya, sèngko’ perna nolong kana’ lalake’ lamba’. Bâ’na arapa ma’ tao?” Oca’ Rada.

“Kana’ lake’ ruwa sèngko’, Da” Bara nyaot.

“Beh… iya apa? Ta’ nyangka sèngko’ katemmo pole ka bâ’na ya!” Oca’ Rada senneng katemmo pole ka kanca bakto kini’na.

Bara bhunga polana tao jha’ bhenḍer Rada kana’ bine’ se lamba’ nolong abâ’na sambi aberri’ manisan cupcup. Mèlana ḍâri manisan cupcup ghânèka Bara kasambhu’ ḍâ’ Rada, lantas tarèsna ḍâ’ Rada. Manisan cupcuppa pagghun bâḍâ sampe’ samangkèn èsèmpen sareng Bara. Bara lajhu matao manisan cupcup sè Rada lambâ’ perna aberri’ ka Bara. Bara ta’ perna loppa ngèbâ manisan cupcup ghânèka sabbhân bakto. Tekka’na manisanna kadaluarsa pagghun èsèmpen bân Bara.

Bara arassa posang. Abâ’na arassa bhunga molana katemmo polè sareng kanca ghi’ kènè’na lambâ’ napa pannèngnga katemmo polè ḍâ’ ka orèng sè èkaterro ḍâri lambâ’. Tarèsna ḍâ’ Rada aghâbây Bara terros nyimpen manisan cupcup ḍâri Rada. Molana, sakalè katemmo lambâ’ bâkto nolong Bara, Rada bân Bara ta’ perna katemmo polè. Cokop bâkto ghânèka, Bara arassa yakin jhâ’ Rada engghi takḍirrâ Bara. Bara sabbhâr ngantos sampè’ katemmo polè sareng Rada.  

 

  

*) (Kelas XII SMAN 1 Asembagus 2021/2022)