Oleh : Fendi Febri Purnama*
ENNÈ’ TÈKANA
Ennè’ Ennè’
Akèpek pètanyana ḍâteng
Dhika jhâjjhuluk
Saparadhek pajjhâr ka sèyang para’ asar bhâkal èbâca
Petteng calèmot dhunnya
Ghi’ araghâ ta’ alanganna
Tapaghâr èḍiyâ labâng nyèsè laèn
Bhinareng taḍâ’ bâcana manossa
Èyapèngè sè abhâḍhi sakabbhinna
Robâ mara napè jhârna’ mastè
Mar-samar sonar kennengan sala
Potè celleng adhâmarè sorem
Solorra Ghung Bhirâ
Pola sacapcap nyapcap ka sè pon èghâgghâri kembhângnga jhâmbhu
Tatotop rassa ngalèngsang
Aḍḍreng bâringèn è tengnga aros
Ennè’ Ennè’
Parantè, 14 Sora / 14 September 2019
BÂLIJJHÂ
Antosanna bun ḍâpor
Salèmberrân ta’ sèttong
Salang sambhit ma’ ontong
Sèttong ḍuwâ’ sèttong ḍuwa’
Tapakpak satèya bâ’na
Tello’an ḍuibu mara
Tello’an saèbu maḍḍhâ
Tello’an lèma ratos mara
Tello’an ḍuwâ’ saèkèt maḍḍhâ
Kecca’na bibir tèpès aola
Nyoghuwâ bun ḍâpor ta’korang palappa
Ngaddhu orak
Sopaja bhâthè abâliyâ ka pa’-lopa’
Bun ḍâpor karè mèlè
Pangrasa maso’a ka atè
Rèng sè nyarè kasap ma’ lè dhujân
Dhâlubâng mèra bisa èkeppay
Sè bâlijjhâ rep-areppan
Sèngko’ mandhârâ bâḍâ pèleyanna
Pa’po’ ta’ ngarep, ghumo’ ontong sè èkabâjâng
Bâ-ghibâna li-bâliyân ajhâjhâ
Bâr-Abâr, 24 Sappar / 24 Oktober 2019
GHEḌḌHHÂNG MABU’
Ghâdhebbhung bâjhâng
Mangmang sabâb ngarasngas
Kèjhângan nèko konèng
Nonto sè ngabâs jhâjhâringen
Pola anapè kolek taḍâ’ taghiyur
Ompossa katon kalaras
Ghetta kerrèng ta’ abâjâ
Embhuk pek-kèpekkan
Palegghirân klaras klarè ètampèk
Meggu sèttong lantaran
Merrè ètoraè pastè
Anèko mabu’ rabâs jhâ’ apettha
Parantè, 27 Sappar / 27 Oktober 2019
OLO ONJHUR
Sènga’ nèko amarghâ anapè
Celleng asanḍhing potè
Sèyang aghântè malem
Attas ghâgghâr bâbâ ngombâr
Bulâ lakè’ dhika binè’
Obu sè bhâghus biḍḍhi sè jhubâ’
Pastè pon kacèpta
Karsana Ghustè sè nyata
Sadhâjâna pon teppa’ ghilina
Bighina accem maghi’ nyamana
Kennengan sala sè cengngar bhinar
Metthèk atèna atè
Ḍari olo nojjhu onjhur
Katètè oḍi’ pastè patè
Parantè, 27 Sappar / 27 Oktober 2019
MOTHAK BHUTHAK TENGNGA
Ngèr-sengngèran matao ghighi
Amaca’ teppa’ aghicca’
Aorak bâjâ tèra’ tana
Ataḍâ terro kabbhi
Tama’ ajhilât kerrak
Bhuḍhâk onḍung
Aghunonga sango lagghu’
Ella ongghu
Emmas èḍinna’ alèrèk salaka
Jhâghât èyompa’a sakareppa
Kala Bathara Kala ngompa’ bulân arè
Tasanglèp ècepta ḍari èna
Kèler alatlat ka rebbhâ
Bhuthâk satèya è tengnga
Tatengnger sakejjhâ’ agghi’
Tèmbhângân bâles Pangèran ta’ kèra sala
Parantè, 27 Sappar / 27 Oktober 2019
Angghidhân : Fendi Febri Purnama (Ghuru Bhâsa Madhurâ SMA Negeri 1 Asembagus)
Tinggalkan Balasan