Oleh: Kyaè Nabuy*
Oḍi’ mellas sabbhân arè
Acemmacem èpèkkèrè
Mèkkèr bhâdhân mikkèr oḍi’
Bhâkal bulâ ghi’ ta’ anḍi’
Kabit lambâ’ sampè’ nonto
Taḍâ’ sè ngala’a manto
Mon teppa’na arè tellas
Bhâdhân jân arassa mellas
Kadhibi’ân lamon tèḍung
Enneng èpaddhuna gheḍḍhung
Amèmpè ta’ ro-karowan
Segghud ngajhâ’ ro-serrowan
Bilâ ngerrok aker-cekker
Jhâil aghili ka tèker
Seksek ta’ ngennèng anyabâ
Oḍi’ mellas saterrossâ
Sarong bâu èkabhuko’
Tèḍung mèrèng ko’-malekko’
Kolè’ kacep bhâdhân cellep
Sè tèḍung ta’ ghellem leplep
Mon sakè’ taḍâ’ atoghu
Pèra’ èkarobung regghu
Tambâ renggè’ ondhur ḍâteng
Dhâmar matè kamar petteng
Bengko coma ḍâri tabing
Pèngghirrâ ampon bâng-salbing
Osom ojhân lako bhucor
Ghentèngnga bânnya’ sè ancor
Lèncak rèyot kakan raprap
Reppèk sè anyama sèrap
Talè’è ngangghuy jhâlingè
Èkarobung bân ngèrenggè
Bhântal tèpès pas èrangkos
Kapona èkakan tèkos
Bhurto’ kabbhi bhântal ghuling
Bhân malem èkoro’ jhuling
Sè èkakan nasè’ jhâghung
Pas ngènom aèng sabâghung
Jhuko’ acan sella kènḍuy
Ghângan maronggi pon bâruy
Sè ngèro’ ngabi’ satobung
Tabu’ pending pas malembhung
Èntar ghelluran acèrè’
Toju’ nèngkong pas ngaṭèrè’
Aroko’ mèsel pa’-lopa’
Èsel-ghungsel taker pèppa’
Bhâko ameng abâto’an
Tabu’
sembeng akento’an
*) Penulis merupakan pemerhati bahasa Madura
Tinggalkan Balasan