Oleh: Fendi Febri Purnama
RAJHEG
Rajheg bessè apapocok,
Kerras akerrès ongghu,
Rekka’-rekka’ rakèt ella oḍâr,
Kèrana lambâ’ la èlaor,
Tangghâ tepparo ella’ saghârâ.
Masaghi obbhârân tana mènangka tanḍhâ,
Bhuto sè butto ella bhânas,
Pangrasa jhâghât parlo ka padhâna,
Sèngko’ angghumo’ ḍâḍâ,
Mon ta’ sèngko’ sapa èson.
Rajheg aropa anggâ’,
Alarlar saongghuna abâ’,
Keddhâ’,
Ghâmbhâr pastèna kalèp,
Ghi’ èghutonga kèya.
NGAREMBENG
Asèla abâ’,
Alama’ tèker ra-kara,
È tanèyan lanjhâng lambâ’na,
Sè sanonto gheḍḍhung sè bulâ sanḍâri.
Ngenḍep bâgiyân ḍâri parnata,
Rèng Madhurâ tor toronna,
Sanonto ta’ atoran jâr-gânjir,
Ngarembeng ta’ èkarassa.
Tanèyan lanjhâng pon èlapès cètha’anna
lolo,
Ḍhutḍhut mala praoto ta’ tao bâkto,
Sè maghuli ta’ atoran ta’ atolè,
Ngarembeng aghili.
Sataon agghi’ bârâmma?
BÂNGKÈT
Bângkèt,
Mon tobâng ta’ burung sè akèkèt,
Ca’na jâi salèng partajâ,
Laèn natkala laèn oca’ teḍḍâ’na,
Kaju jhârân kodhu ghântè paèsan,
Ma’ na’na’ jhârnâ’ sapa rèya,
Ḍârâ,
bâḍḍhâ bhâji’, mama’, embu’ èsènglaè ongghu,
Mon la sèngko’ iyâ sèngko’, ta’ usa bâ’na,
Tèngel ka bhuwâddhâ,
Jhâ’ rowa ka bidhina bhumè,
Tekka’ rèya oloranna tana haram,
Ghemmet ongghu bâ’na Cong Bhing!
TALAOR
Ta’ kabitong moncarra arè ḍâri tèmor,
Ta’ kaètong soroppa arè è bârâ’,
Dhunnya sajân towâ parana,
Tatèngkan tasellem kèya masèna.
Arossa nyosso’,
Ḍhâjhung ella bânnya’ sè bellâ,
Ghitèk ta’ burung nyèllem,
Nongngep nongkèlang ta’ atoran,
Tangkop lajârrâ,
Pola angèn abhânto,
Ngaopè pelka’ ahang ta’ nèng jâ-kajâ,
Sambi asango mangghâr bi’ ḍhâḍhung,
Talaor ongghu,
Perrèng malang è songay,
Pangambri ḍi malang sara’.
PAKONA
Sapèttong toron,
Ka bhungkèlla sakalè,
Ka ramo’ ghâsèngnga,
Taḍâ’ sowarghâna,
Yeg-pèyekkan pencarra ḍârâna,
Ghântèng colpè’,
Salang sènthem,
Patang coco.
Kelbhu’ nyabâ ta’ ajhi,
Ngembina ponakan ta’ mardhuli,
Obânna majhâḍhi’ ta’ èkaparlo,
Èdhiddhâ’ èkèppar èdhilbhâs,
Adhighâng adhighung adhighuna,
Pakona la nayyèng lajhu lebbhur ta’ akarè.
Parantè Ḍâjâ
Salasa, 13 Agustus 2024
7 Sappar 1446 Hijriah
Tentang Penulis
Fendi Febri Purnama Guru & Penggiat Bahasa Madura
Tinggalkan Balasan